Nagapati ang isa ka criminal law expert nga naplano sang maayo ni anay Presidente Rodrigo Duterte ang iya pagtambong sa Senate hearing kag maghatag sang iya statement natuhoy sa drug war sang iya sadto administrasyon.
Sa interview sang Bombo Radyo kay Atty. Nelson Borja, iya ginpahayag nga sa iya paglantaw, estratehiya ini ni Duterte agud nga ipakita sa International Criminal Court nga nagahulag ang justice system sa Pilipinas kag agud indi na kinahanglan nga magpatigayon sang imbestigasyon ang nasambit nga tribunal nga nakabase sa The Hague, Netherlands.
Suno kay Atty. Borja, posible nga intensyon man ni Duterte amo nga ma-divert sa iya ang atensyon kag indi na maulamid pa ang mga katapo sang Philippine National Police nga amo ang ginatudlo nga nagapangamot sa mga pagpatay sa mga drug suspects.
Ginpahayag pa ni Borja nga kun basehan naman ang ginpangbuy-an nga mga pahayag ni Duterte sa Senado, lunsay wala ini sang direkta nga pag-ako sa iya bahin nga siya ang nagsugo agud magpatay sang mga drug suspects sa mga operasyon.
Suno sa natungdan, ginapresentar ni Duterte nga lehitimo ang mga operasyon gani indi man ini makwestyon.
Dugang pa niya, kun gamiton gid man ang mga pahayag sang anay president agud itum-ok ini sa mga kaso sang pagpamatay sa tion sang drug war, wala ini sang bug-at kag dako ang tsansa nga ibasura ini sang korte.
