Patay ang mag-asawa kag ang ila bata nga babaye matapos matapos nabungguan sang pick-up truck ang ila ginasakyan nga motorsiklo sa Barangay Canas, San Dionisio, Iloilo.
Ang mga biktima amo sanday alias Artemio, ginabanta 60-anyos; alias Angelie, ginabanta 50-anyos; kag ang 15-anyos nga bata nila nga si alias Angelie, lunsay residente sang Barangay Cubay sa amo nga banwa.
Ang driver naman sang pick-up truck amo si alias Alex, 26-anyos nga negosyante kag residente sang Calinog, Iloilo.
Sa interview sang Bombo Radyo kay Police Captain Edward Villanis, officer-in-charge sang San Dionisio Municipal Police Station, iya ginpahayag nga nagasundanay ang motorsiklo kag pick-up truck nga pakadto sa direksyon sang banwa sang Estancia sang natabo ang aksidente pasado alas syete kagab-i, Nobyembre 9.
Bangud madulom sa national highway, ginaalegar nga sang nag-overtake ang pick-up truck, nayudyod sini ang motorsiklo sang ginabanta 100 metros.
Dead on the spot ang mag-asawa samtang nadala pa sa ospital sa Sara ang dalagita nila nga anak apang gindeklarar man nga ginbawian sang kabuhi.
Lunsay samad sa ulo ang rason sang ila kamatayon.
Magluwas sa magpamilya, may isa pa ka driver sang motorsiklo nga nagasunod sa mga na-disgrasya ang nakaangkon man sang menor nga mga samad sa lawas apang subong nakaguwa na sa ospital.
Base sa pulis, nakadulog pa ang driver sa mismo lugar kun sa diin natabo ang aksidente apang bangud sa kakulba sini, nag-diretso ini sa pag-drive kag nagsungka sa San Dionisio Police Station.#
