Mahimo nga may tyansa na nga mabalik sa Pilipinas paagi sa “transfer of prisoner” policy ang overseas Filipino worker (OFW) nga si Mary Jane Veloso nga masobra na isa ka dekada sa presuhan sa Indonesia kag yara sa death row matapos napasibangdan nga tuyo magpasulod sang iligal nga droga.
Sa press release sang Indonesian Coordinating Ministry for Legal, Human Rights, Immigration, and Correction (Kemenko Kumham Imipas), ginpahayag nga ginakonsiderar nila subong ang option sang “transfer of prisoner” ukon ang prisoner transfer para sa foreign inmates bilang parte sang constructive diplomacy.
Nadiskusyunan ini sa meeting kay Philippine Ambassador Gina Alagon Jamoralin kun sa diin ginplastar ni Coordinating Minister Yusril Ihza Mahendra nga ginatib-ong sang Indonesia ang legal sovereignty kag may commitment nga ipatuman gid ang criminal sanctions santo sa mandu sang korte.
Ginpahayag man ni Yusril nga nadiskusyunan na ini sang separado sa Kemenko Kumham Imipas kag napahibalo na kay newly-elected President Prabowo Subianto.
Sa subong, naga-formulate sila sang polisa nga maresolba ang isyu sang foreign prisoners sa ila pungsod paagi sa bilateral negotiations ukon sa transfer of prisoner.
Pananglitan ma-aprubahan ang request, mahimo mapadayon sa Pilipinas ang nabilin nga sentensya kay Veloso apang subject pa sa mga kondisyon nga igaplastar sang korte sa Indonesia.
Gindugang sang Coordinating Ministry for Legal, Human Rights, Immigration, and Correction nga nagapadayon ini sa pagpakig-angot sa relevant parties para maka-formulate sang dugang nga procedures lakip na ang mga negosasyon kag bilateral agreements kaupod sa gobyerno sang Pilipinas.
“The Philippine government is obligated to acknowledge and respect the legal process regarding Veloso, including the verdict issued by the Indonesian court,” dugang ni Yusril. “Our nation’s sovereignty in prosecuting crimes committed by foreign nationals must be fully respected.”
2010 sang nag-abot si Veloso sa Indonesia sa tuyo nga makapangamo agud makabulig sa iya pamilya kag hatagan sang maayo nga buasdamlag ang iya duha ka bata nga lunsay menor de edad, apang sa pagtapak pa lamang sini sa airport sa Yogyakarta, nakuhaan sang 2.6 kilograms nga heroin ang iya nga luggage nga nagabalor sang ginabanta P28 million.
Gin-sentensyahan si Veloso sang kamatayon paagi sa firing squad apang nahatagan sang last-minute nga kanselasyon ang amo nga sentensya sang Abril 2015 sang ginpahibalo sang gobyerno sang Pilipinas sa Indonesia nga nagsungka ang recruiters ni Veloso.
Gina-inster sang Pinay nga biktima siya sang human trafficking.
May human trafficking case kag large-scale illegal recruitment cases nga gin-file batok sa traffickers ni Veloso nga sanday Julius Lacanilao kag Cristina Sergio sa Regional Trial Court sang Nueva Ecjia.
Sang 2020, may guilty verdict nga gindagdag kaangot sa illegal recruitment case sa recruiters samtang pending naman ang trafficking case.
Sang Enero 2024, nagsulat ang pamilya Veloso kanday anay Indonesian President Joko Widodo kag President Ferdinand Marcos Jr. para mag-apelar sang clemency kaangot sa kaso sang Pinay.#
