Ginbalik na sa detention cell sa Philippine National Police (PNP) Custodial Center ang kontrobersyal nga religious leader nga si Apollo Quiboloy masobra isa ka semana matapos gin-grant sang korte ang medical furlough bangud sa kondisyon sang iya korason.
Suno kay PNP public information officer chief Brig. Gen. Jean Fajardo, nakabalik sa Campo Crame ang founder sang Kingdom of Jesus Christ (KOJC) pasado alas singko kahapon sang hapon, Nobyembre 16.
Nobyembre 8 sang gin-aprubahan sang korte sa Pasig ang request sang kampo ni Quiboloy para sa medical furlough bangud sa pagpalamin-ot sang iya dughan.
Halin sadto, nagpaidalom ini sa dugang nga medical tests sa children’s hospital sa Quezon City ilabi na bangud nagakinahanglan ini sang specialized equipment.
Samtang yara sa ospital, ginbasura sang korte ang request sang pastor nga magbaton sang mga bisita.
Indi man pagpasugtan sang PNP ang request sang kampo sini nga sila na ang magakay-o mismo sang custodial facility para sa alleged abuser.
Una na nga ginpahayag sang abogado sini nga masobra na sa 70-anyos ang edad sang pastor kag mabudlay na para sa iya ang paglimpyo pati sang iya toilet. Ginpahayag man anay ni Atty. Israelito Torreon nga naghingyo sila sa pulis nga may ibutang nga gamit sa detention cell para mangin maayo ang ventilation.
Nahibaluan nga naka-detain si Quiboloy bangud sa mga kaso nga qualified human trafficking kag sex abuse nga na-file sa Pasig kag Quezon City courts apang magapadalagan pa ini sa pagka-senador sa 2025 elections.#
