𝗜𝗟𝗢𝗜𝗟𝗢 – Naghatag sang dako nga bugal sa Iloilo ang mga graduates sang West Visayas State University College of Agriculture and Forestry nga nakasulod sa Top 10 sang October 2024 Professional Forester Licensure Examination.
Ini amo sanday Jessa Jean Torino Flores sang Barangay Gaub, Cabatuan, Iloilo nga rank 5 kag nakakuha sang 91.80% nga rating kag Yzabella Arevalo Guillen sang Carles, Iloilo nga rank 10 kag nakakuha sang 91.80% nga rating.
Sa interview sang Bombo Radyo kay Flores, iya ginpahayag nga tuman siya nga nasorpresa nga nangin rank 5 sa pasinawan kag tuman man ka mapinasalamaton.
Suno kay Flores, handom sini sang una nga mangin nurse, apang sang nakatapos ini sa senior high school didto kag naisipan sini nga magkuha sang kurso nga Bachelor of Science in Forestry.
Nangin sekreto naman sini sa pagkuha sang pasinawan amo ang time management.
Samtang suno naman kay Guillen, apisar indi mahapos ang pasinawan, nagtutom siya sa pagtuon agud makasulod sa Top 10.
Ginpahayag sini nga halos kada tuig, may yara sang naghalin sa ila unibersidad nga yara sa Top 10 kag nagalaom ini nga magpadayon ini sa mga masunod pa nga tinuig.
