Indi pa pagbatunon sang General Services Office ukon GSO ang masobra P3 milyon nga electric mini sweeper truck tubtob makumpleto ang inspection kag requirements nga kinahanglan sang City Government.
Sa interview sang Bombo Radyo kay GSO Head Engr. Neil Ravena, iya ginpahayag nga ang una nga pag-operate sini isa lamang ka demonstration kag indi pa opisyal nga turnover.
Suno pa kay Ravena, paga-chekyaron pa sang GSO ang tanan nga gin-deliver sang supplier, lakip ang after-sales services, extra battery, plastic bristles kag 220-volt automatic charging system.
Pahayag pa sini kon makumpirmar nga kompleto kag compliant ang unit, magahimo ang GSO sang report nga ipasa sa Bids and Awards Committee para sa sunod nga proseso.
Ang mini sweeper truck may vacuum kag sweeping system, 1.6-tonelada nga capacity, tubtob 8 ka oras nga operating time, kag 1,000-liter water capacity.
Ginapaabot nga magabulig ini sa pagpaninlo sang mga lugar nga mabudlayan ma-access sang dalagko nga garbage trucks, kag makabulig sa mga beautification personnel agud maka-pokus na lang ang mga ini sa landscaping kag maintenance.
