Ginpanawagan ni Iloilo 5th District Board Member Rolex Suplico ang hugot nga pagpatuman sang Anti-Epal policy sang gobyerno kasunod sang iya mga obserbasyon sa pagbutang sang mga pangalan kag litrato sang mga politiko sa mga proyekto nga ginpondohan sang gobyerno.
Sa iya privilege speech sa Sangguniang Panlalawigan, gintumod ni Suplico ang Department of the Interior and Local Government (DILG) Memorandum Circular No. 2026-006 nga ginpirmahan ni Interior Secretary Jonvic Remulla sang Enero 29, 2026.
Ang nasambit nga memorandum amo ang nagadumili sa pagbutang sang mga pangalan, litrato, logo kag iban pa nga marka sang mga public official sa mga proyekto kag signage sang gobyerno.
Gin-angot ni Suplico ang iya panawagan sa presensya sang mga dalagko nga tarpaulin nga may laragway ni Iloilo 5th District Representative April “Binky” Tupas kag sang iya bana nga si anay 5th District Rep. Raul “Boboy” Tupas, nga suno sa iya yara sa tupad ukon malapit sa mga proyekto sang gobyerno sa distrito.
Ginpahayag ni Suplico nga ang mga poster nagagamit sang pangalan nga “BIBO,” nga nagatumod sa kombinasyon sang mag-asawa bilang BINKY kag BOBOY.
Ginkwestyon man ni Suplico ang paggamit sang mga tinaga nga “IN GOD WE TRUST” kag “PROYEKTO SANG PUMULOYO” sa mga materyales nga iya ginapatihan nga kabahin sang ginatawag niya nga “epal” practice.
Ginpamangkot man ni Suplico kun nagahimo bala sang ila katungdanan ang mga Municipal Local Government Operations Officers kag iban pa nga sakop nga opisyal sa pagpatuman sang anti-epal policy.
Sa pagtapos sang iya privilege speech, ginpahayag ni Suplico ang iya pagkadismaya sa padayon nga ginapatihan niya nga paglapas sa polisa kag gin-liwat ang iya mga tinaga nga: “Unashamed. Shameless. Shameful.”
