Ginalantaw sang World Bank nga maghatag sang $3 billion ukon P185.40-billion nga loan sa Pilipinas agud nga masuportahan ang mga programa sa pungsod para sa masunod nga fiscal year.
Suno kay Zafer Mustafaoglu, division director para sa Pilipinas sa World Bank, ginapreparar sang multilateral lender ang listahan sang mga proyekto nga suportahan sa Pilipinas para sa masunod nga fiscal year nga magsugod sa Hulyo 1.
Lakip sa ila pipeline ang pagsuporta sa gobyerno bilang sabat sa krisis dala sang gyera sa Middle East.
Ini bangud ang padayon nga tensyon sa Middle East ang nagresulta sa pagsaka sang presyo sang gatong kag iban pa nga mga produkto sa lokal nga merkado.
Ginsiling man ni Mustafaoglu nga lakip sa pipeline ang padayon nga suporta sa Pantawid Pamilyang Pilipino Program (4Ps) — programa nga nagatinguha nga mautod ang siklo sang kapigaduhon paagi sa conditional cash transfers para suportahan ang ikaayong-lawas kag edukasyon sang mga kabataan.
Lakip man sa pipeline ang mga proyekto para sa pagpauswag sang mga abilidad ukon skills development, modernisasyon sang mga proseso sang gobyerno, kag iban pa nga mga estruktural nga reporma.
“Yes, we always have a pipeline of programs,” suno kay Mustafaoğlu.”For the next fiscal year … we have a pipeline that includes projects from the continuation of 4Ps (Pantawid Pamilyang Pilipino Program), projects on skills, projects on government modernization.”
Nagapakig-istorya ang World Bank sa gobyerno samtang ginarepaso sini ang mga prayoridad para sa iya programa sang pagpanghulam.
Ginsiling ni Mustafaoglu nga ginasuportahan sang World Bank ang paninguha sang gobyerno nga mapadasig ang implementasyon sang mga proyekto.
“The government is going through that prioritization and calibration. The government is discussing this with all multilateral development agencies. This is an ongoing discussion,” pahayag pa ni Mustafaoğlu.
Sa idalom sang Country Partnership Framework sang World Bank para sa Pilipinas para sa tuig 2025 tubtob 2031, ang target amo ang pagpaayo sang kalidad sang kabuhi sang mga Pilipino paagi sa mas maayo nga mga oportunidad kag pagpalig-on sang ila kapasidad nga makabawi sa mga krisis kag kalamidad.
Ang framework nagahatag sang atensyon sa proteksyon para sa mga pigado, edukasyon, ikaayong lawas, paghimo sang trabaho, resiliency, digital connectivity, kag pagduso sang mas madamo nga pribado nga investment.#
