Nanilhig lang kag nagtupad ang duha ka mga indibidwal bilang benepisyaryo sang Tulong Panghanapbuhay sa Ating Disadvantaged/Displaced Workers ukon TUPAD program, apang nangin palaagyan ini agud magtubo ang ila paghigugmaanay.
Ini amo sanday Ken Sutacio, 35 kag Arlyn Joy Italia,30 nga lunsay pumuluyo sang Sta. Barbara.
Sa interview sang Bombo Radyo kay Sutacio, iya ginpahayag nga sa una palang niya nga pagkakita kay Italia sa kilid sang suba samtang nagapaniilhig, nagustohan na niya ini.
Suno naman kay Italia, sang nakilala man niya si Sutacio, nasiling niya sa iya kaugalingon nga ini ang iya gusto pamanahon.
Didto na nangaluyag si Sutacio kag matapos ang pila ka bulan, ginsabat niya ini.
Sang damlag lang, nag-propose sang kasal ang lalaki kag nagpasugot man ang babaye.
Dako ang pagpasalamat sang duha nga paagi sa DOLE-TUPAD, nakilala nila ang sa isa kag isa nga magabug-os sang ila ginahandom nga tukuron nga pamilya.
Sa ila pre-nuptial photos, ginhimo man nila nga tema ang DOLE-TUPAD bangud dako ang papel sini sa ila love story.
