Nagmandu si Philippine National Police (PNP) Chief Gen. Rommel Marbil nga imbestigaran ang “assassination” remarks ni Vice President Sara Duterte batok kanday President Ferdinand Marcos, Jr., First Lady Liza Marcos, kag House Speaker Martin Romualdez.
Sa statement sang PNP, ginsiling sini nga ginakilala sini kun daw ano ka-seryoso ini nga isyu kag himuon sini ang legal kag kinahanglanon nga mga lihok sandig sa layi.
Ginsiling sang hanay sang kapulisan nga isa ka national concern ang safety sang presidente kag iga-address nga may “highest level of urgency” ang anuman nga pamahog sa iya kabuhi — direkta man ini nga pamahog ukon indi.
“The PNP Chief, Police General Rommel Francisco D. Marbil, has directed the Criminal Investigation and Detection Group to conduct a thorough and immediate investigation into this issue,” kabahin sang statement.
“We assure the public that the PNP will work diligently to ensure the safety of all concerned and will take the necessary legal actions in accordance with the law,” dugang sa pahayag sang kapulisan.
Nagpaguwa man sang statement ang Armed Forces of the Philippines (AFP) nga nagpanindugan nga loyal sila sa Konstitusyon kag sa chain of command kag nagpanawagan man sang pagkalma kag pagresolba sang mga bagay.
Suno kay AFP Chief-of-Staff Gen. Romeo Brawner Jr., isa ka professional organization ang AFP kag nagatutok sa mandato sini nga proteksyunan ang mga tawo kag ang estado.
Suno pa kay Brawner, nagapangatubang ang pungsod sang mas daku nga mga pagpanghangkat nga nagakinahanglan sang kabakod kag pag-isa sang pungsod kag sang pwersa-militar.
Ginklaro sang AFP chief of staff nga nagapabilin ini nga non-partisan kag may pinakamataas nga respeto sa democratic institutions kag sa civilian authority.
“We call for calm and resolve, and for everyone to hold on to our values of respect and nationalism that will guide us in these trying times,” dugang ni Brawner.
Kun balikan, Sabado sang aga sang nagbuga sang iya kaakig si Duterte kag ginpautwas ini tanan paagi sa Zoom press conference matapos ginmandu sang Kamara nga isaylo ang iya chief of staff nga si Atty. Zuleika Lopez sa Women’s Correctional Facility sa Mandaluyong City.
Pila ka beses nga ginbuyayaw ni Sara sanday President Marcos, First Lady, si House Speaker, kag ang mga tawo sa Kamara.
May isa ka bahin sang press conference nga ginsiling sini nga kun mapatay siya, nagmandu man ini sa ka tawo nga patyon man sanday President Marcos, ang first lady, kag ang house speaker.
Ginklaro pa sini nga wala siya nagalahog sa iya nga order.
“May kinausap na ako na tao. Sinabi ko sa kanya, ‘Kapag pinatay ako, patayin mo si BBM, si Liza Araneta, at si Martin Romualdez.’ No joke, no joke. Nagbilin na ako,” suno kay Sara sa isa ka online press conference.
Kasunod sini, sa interview sang Bombo Radyo, ginklaro ni Sara nga antes pa man niya ginsugid sa publiko ang kill order, may nabaton na siya nga “threat” sa iya kabuhi. Ginpaathag man sini nga ginplastar lang ini ang sitwasyon PANANGLITAN ipapatay gid man siya.
Ginpaanggid man ni Sara ang iya statement sa iya nauna nga ginbuy-an nga deklarasyon nga PANANGLITAN magsige ang mga pagpang-atake sang Marcos Jr. administration batok sa iya, ipakalkal niya ang bangkay ni former president Ferdinand Marcos Sr. sa Libingan ng mga Bayani kag itagbong sa West Philippine Sea.
Wala pa sang personal nga statement nga gin-isyu ang presidente kaangot sa sini nga “kill order.”#
