Nagpasalamat si Vice President Sara Duterte sa professionals nga nagbulig sa mga personnel sang Office of the Vice President (OVP) nga apektado sang krisis nga gina-atubang sang opisina sa tunga sang sampaw-sampaw nga mga kontrobersiya.
Sa video message ni Sara, lakip sa iya ginpasalamatan amo ang mga doctor kag mga abogado.
Gindugang sini nga ginaproseso na sang mga abogado ang ila nga legal documents kag ginatatap naman sang maayo sang healthcare personnel ang mga staff member sang OVP nga na-ospital.
Suno pa kay Sara, bangud sini nga bulig, mas naka-focus siya kag ang iban niya nga personnel sa iban nga mga bagay kaangay sang OVP thanksgiving, year-end activities, office utilization review, kag pagplano sa calendar year 2025.
Gindugang sini sa iya mensahe nga ginapasalig niya sa mga Pilipino nga bisan sa tion sang krisis kag bisan wala sila sang resources, magatindog gihapon sila nga mapag-on para nga makaserbisyo.
“We assure the Filipino people that even in times of crisis and without resources, we shall stand tall, strong and resilient in our service to the Filipino people,” suno sa opisyal. “We will not break.”
Nagapangatubang si Sara sang imbestigasyon sa ginaalegar mga anomaliya sa iya paggamit sang P125 million confidential funds nga wala sa 2022 General Appropriations Act.
Bangud sa sini nga imbestigasyon, nagakalipong kag nagaka-ospital ang iya mga personnel kun mag-atubang na sa Kamara. Lakip sa yara subong sa Veterans Memorial Medical Center (VMMC) amo si OVP Chief of Staff Zuleika Lopez nga una nga gindagdan sang contempt order kag ang Special Disbursing Officer nga si Gina Acosta nga naglain ang pamatyag sang nag-atubang sa House good government panel sini nga semana.
Magluwas diri, gina-imbestigaran man si Sara bangud sa iya komento nga naangot sa asasinasyon matapos gin-ako sini nga may ginmanduan siya nga kun may magpatay sa iya, patyon man si President Marcos Jr, First Lady Liza Marcos kag Speaker Martin Romualdez.
