Nakaguwa na sa Veterans Memorial Medical Center (VMMC) ang chief of staff sang Office of the Vice President (OVP) nga si Atty. Zuleika Lopez.
Suno sa OVP, nagbiya si Lopez sa ospital 6:30 subong nga gab-i, Nobyembre 30, nga inoras lang matapos nag-isyu ang House of Representatives sang release order.
Pirmado ni Manila Representative Joel Chua, chairperson sang House Committee on Good Government and Public Accountability, ang order para kay Lopez.
“In view of the undertaking to attend all hearings, you are hereby ordered to immediately release Atty. Zuleika T. Lopez after a medical examination has been conducted on her,” kabahin sa nangin mandu ni Chua.
Halin pa sang Nobyembre 23 sang na-confine si Lopez sa Veterans Memorial Medical Center. Gindalagan siya sa ospital matapos naglain ang pamatyag bangud sa desisyon sang panel nga isaylo siya halin sa detention facility sang Kamara pakadto sa Correctional Institution for Women sa Mandaluyong City sa mismo nga tungang gab-i.
Nobyembre 25 kuntani maga-expire ang detention apang ginpalawig ini sang Kamara tubtub subong nga Nobyembre 30.
Na-detain siya sa Kamara bangud sa contempt order nga gindagdag sang committee ni Chua bangud sa iya “undue interference” sa imbestigasyon sang panel sa ginaalegar nga mga anomaliya sa confidential funds sa mga opisina nga ginapamunuan ni Vice President Sara Duterte.
Sang gab-i nga gindala siya sa ospital, didto man naglupok ang kaakig sang bise-presidente, makapila ka beses nga nagpamuyayaw sa press conference bisan kaagahon, gintawag nga incompetent kag butigon si President Ferdinand Marcos, Jr., kag ginlaragway man nga kurap, kawatan, kag naga-ambisyon nga mag-presidente si House Speaker Martin Romualdez.
Sa amo man nga gab-i ginbuy-an ni Sara ang “kill order” batok sa first couple kag sa house speaker nga subong subject na sa imbestigasyon sang National Bureau of Investigastion (NBI).#
(Photo: Jonathan Andal)
