Wala nadayon ang arraignment sang aktres nga si Neri Naig-Miranda para sa kaso nga syndicated estafa nga ginpasaka batok sa iya.
Suno sa Pasay City Regional Trial Court Branch 112, nagahulat pa sila sang komento halin sa prosecutor matapos nag-file sang motion to quash ang kampo sang aktres.
Sa subong, nagapabilin ang aktres kag businesswoman sa ospital para sa medical evaluation.
Natalana naman ini nga magbalik sa Pasay City Jail’s female dormitory sa Mierkules (subong nga adlaw).
Matandaan nga gin-aresto si Neri sa basement sang convention center sa sulod sang mall sa Pasay City sang Nobyembre 23.
Nagapangatubang ini sang panumbungon nga syndicated estafa kag 14 counts sang violation sang Securities Regulation Code.
Ang legal issue batok kay Neri ang naangot sa mga tseke nga gin-isyu sang Dermacare-Beyond Skin Care Solutions sa mga investors, nga nagsugod sa pag-bounce matapos nagpagwa ang Securities and Exchange Commission (SEC) sang advisory batok sa kompaniya.
Suno sa SEC, indi otorisado ang Dermacare nga mag-solicit sang investments bangud indi ini rehistrado kag wala sang lisensya nga magbaligya sang securities.
Si Neri ang nangin endorser kag franchisee sang Dermacare sang October 2020, apang gin-anunsyo niya sang Septyembre 2023 nga indi na ini konektado sa kompaniya.
Mangin ang actress nga si Rufa Mae Quinto, nga endorser man sang Dermacare, ang nagapangatubang man sang kaangay nga panumbungon.
Ginapangita naman sang otoridad si certain Chanda Atienza, nga ginapahayag nga tag-iya sang Dermacare.
