Nagahanda ang Iglesia ni Cristo (INC) sa pagpatigayon sang nationwide rally agud nga pamatukan ang impeachment complaints batok kay Vice President Sara Duterte.
Gin-anunsyo ini sa isa ka television program nga “Sa Ganang Mamamayan” sang media outlet sang nasambit nga religious group.
Base sa statement, himuon nila ang rally bangud pabor sila sa opinyon ni President Ferdinand “Bongbong” Marcos, Jr. nga indi na dapat pag-i-iduso ang complaint batok kay Sara kundi dapat unahon sang gobyerno ang mga problema diri sa Pilipinas.
Ginpahangop man sang INC nga luyag nila ang kalinong kag indi sila luyag sang anuman nga kagamo nga maghalin sa bisan diin nga kampo.
“Ang mga kapatid sa INC ay naghahanda na magsagawa ng rally upang ipahayag sa lahat ng kinauukulan na ang INC ay pabor sa opinyon ni Pangulong Bongbong Marcos na hindi sumang-ayon sa isinusulong ng ilang sektor na impeachment dahil maraming problema ang ating bansa na dapat unahin ng pamahalaan,” kabahin sang statement.
“Ang INC ay para sa kapayapaan. Ayaw natin sa anumang uri ng kaguluhan na manggagaling sa anumang panig,” dugang diri.
Nahibaluan nga duha na ka impeachment complaints ang opisyal nga na-file sa Kamara batok kay Sara.
Ang una ang ginpasaka sang civil society organizations samtang ang ikaduha naman ang gin-file sang mga mamalidha halin sa Makabayan bloc bangud sa ginaalegar nga “betrayal of public trust.”
May impormasyon man halin kay House Secretary General Reginald Velasco nga may ikatatlo pa gid nga complaint nga iga-file antes magtakop ang masunod nga semana, apang wala pa sang detalye nga nahatag.
Nahibaluan nga ang INC isa ka 110-year-old Christian church nga may 2.8 million members.
Nagsuporta ini sa UniTeam nga tandem anay nanday Marcos kag Sara sang 2022 elections.
Kun balikan ang developments sini lang nga tuig, apisar nag-away na ang mga Marcos kag Duterte, pareho gihapon sila nga nagapangaluyag para sa suporta sang INC executive minister nga si Eduardo V. Manalo.
Sang Oktubre 1, nagbisita ang vice president sa INC Central Office kag sang Oktubre 10 naman, nagkadto man si former President Rodrigo Duterte kaupod ang iya long-time aide nga si Senator Bong Go.
Sang Oktubre 29 naman, si Marcos naman ang nagbisita kay Manalo kaupod si First Lady Liza Araneta-Marcos kag ila bata nga si Ilocos Norte 1st District Representative Sandro Marcos.
Sang mismo 69th birthday naman ni Manalo sang October 31, may regalo si Marcos nga amo ang presidential declaration. Gindeklarar sini nga himuon nga non-working holiday ang Hulyo 27,2025 nga amo ang 111th foundation anniversary sang INC (apang magatupa man ini sa Domingo nga adlaw.)
Kinaandan na nga todo-pangaluyag ang mga pulitiko sa INC bangud sa ila election promise nga amo ang “bloc voting system” kun sa diin tanan nila nga miyembro ang required nga magboto kun sin-o man ang mga kandidato nga napilian sang simbahan.
