Ginakabig ni Pinoy champ Manny Pacquiao nga “Christmas gift” ang pagpili sa iya sa International Boxing Hall of Fame nga mangin kabahin sang Class of 2025.
Siya ang magapanguna sa latest batch sa patigayunon nga induction ceremony sa Hunyo 5-8 sa Canastota, New York, USA.
Sa statement sang 45-anyos nga boksidor, ginsiling sini nga sa bilog niya nga karera bilang professional fighter kag public servant, nagapabilin nga tinutuyo sini nga madala ang dungog sa Pilipinas kag sa mga Pilipino sa diin man nga bahin sang kalibutan.
“I am so happy that I have been selected to enter the International Boxing Hall of Fame. This certainly is a wonderful Christmas gift,” kabahin sang iya statement nga gin-release sang Hall of Fame. “Throughout my career, as a professional fighter and a public servant, it has been my goal to bring honor to my country, the Philippines, and my fellow Filipinos around the world.”
“Today, I am humbled knowing that in June, I will receive boxing’s highest honor, joining our national hero, Flash Elorde, as well as my trainer and friend Freddie Roach,” dugang sini. “I am very grateful to those who voted for me, and I look forward to celebrating with family, friends, and fans at Induction Weekend in Canastota, New York.”
Ginakabig ang tumandok sang General Santos City nga isa sa most decorated boxers sa maragtas nga nakadaog sa world championships sa walo ka weight divisions halin sa flyweight pakadto sa super welterweight.
Nagretiro ang Filipino southpaw sa professional boxing sang 2021 matapos ang 72-fight career kun sa diin may yara sang 62 wins, 8 losses, kag 2 draws.
Naatubang sini ang pinaka-popular nga pangalan sa boxing kaangay kanday Marco Antonio Barrera, Timothy Bradley, Juan Manuel Marquez, Oscar de La Hoya, Ricky Hatton, Shane Mosley, Erik Morales, kag Miguel Cotto.
Magluwas nga bantog nga boksidor, may pangalan man nga nahimo si Pacquiao sa guwa sang ring kaaangay sang pagpangalagad bilang pulitiko, philanthropist, kag singer.
Bangud sa iya bag-o nga achievement, updan na sini sa ranks ang iya longtime coach nga si Freddie Roach nga na-induct sa Hall of Fame sang 2012, kag ang Filipino boxing icons nga sanday Gabriel “Flash” Elorde (1993) kag Francisco “Pancho Villa” Guilledo (1994).
Kaupod naman sa iya Class of 2025 amo sanday: Men’s Modern category inductees Vinny Paz kag Michael Nunn; Yessica Chavez, Anne Sophie Mathis kag Mary Jo Sanders sa Women’s Modern category; Cathy Davis sa Women’s Trailblazer category; referee Kenny Bayless; kag cutman Al Gavin (posthumous).#
