Gin-abi-abi ni Vice President Sara Duterte ang mga impeachment complaint nga ginpasaka batok sa iya.
Pahayag sini, mas maayo nga may impeachment case batok sa iya bangud siya lamang ang imbestigaran kag indi na pagdalahigon ang mga kaupdanan niya sa Office of the Vice President kag anay mga personnel sang siya pa ang tiglikom sang Department of Education.
“I welcome that finally na-file na ‘yung impeachment case na sinasabi nila na ifile nila since last year pa,” suno kay Sara.
“So, okay din ‘yung impeachment case dahil ako lang ang tinitira doon, ako lang iniimbestigahan noon. Ako lang ang inaatake ng impeachment case. Hindi na kasali ang nga kasamahan ko sa OVP and mga dati kong kasama sa DepEd. Masagot na ng final kung ano ‘yung mga inaakusa nila sa akin,” dugang sini.
Ini ang una nga tion nga nagkomento ang bise-presidente sa sini nga development matapos una nga gin-file sang Lunes ang first impeachment complaint nga gin-endorso ni Akbayan Party-list Rep. Perci Cendaña. Gin-cite nga basehan ang culpable violation of the constitution, graft and corruption, bribery, betrayal of public trust, kag iban pa nga high crimes.
Sang Miyerkules naman, ginsundan ini sang isa pa gid ka complaint nga ginpasaka naman sang progresibo nga grupo nga Bagong Alyansang Makabayan (Bayan). Gusto sang grupo nga pasabton si Sara sa ginaalegar mga anomaliya sa paggamit sang mga opisina sang confidential funds.
IMBESTIGASYON SA KAMARA
Nagpahayag man si Sara nga makapahuway na sang maayo ang iya staff subong nga natapos na ang hearings sang House Good Government and Public Accountability panel kaangot sa paggamit sang confidential funds sa OVP kag DepEd.
Pito ka mga hearing ang ginpatigayon sang panel kun sa diin nabukaran ang ginaalegar nga iregularidad sa paggamit sang P500 million sa confidential funds sang OVP nga gingasto sang late 2022 kag third quarter sang 2023, kag ang P112.5 million nga ginpain sa DepEd sang 2023.
Ang iban pa nga dalagku nga nabalahuba paagi sa committee amo ang gina-alegar peke nga acknowledgment receipts nga ginpirmahan sang makaduluda nga mga indibidwal kaangay kay “Mary Grace Piattos” nga amo ang nalista nga recipient. Tubtub subong, wala nakilala kun sin-o si Mary Grace. Base sa Philippine Statistics Authority (PSA), wala sila sang record sa amo sini nga pangalan.
Diri man nga committee nasapubliko nga naggasto ang OVP sang P16-million agud mag-arkila sang 34 ka mga safe house sa sulod lamang sang 11 ka adlaw sang late 2022. Ang isa ka safe house ang gingastuhan sang malapit P91,000 kada adlaw.
IMBESTIGASYON SA NBI
Indi liwat magtambong si Sara sa imbestigasyon sang National Bureau of Investigation nga natalana sa Disyembre 11.
Sang nagligad nga Nobyembre 29, wala man nagsipot si Sara sa NBI.
“Ang pagkakaintindi ko sa explanation ng mga abogado ko sa investigation ng NBI ay pwede namang hindi pumunta. Pwede naman magsubmit nalang daw ng sulat or affidavit. Pangalawa meron kaming thanksgiving na mga activities sa December 11, at pangatlo after ng thanks giving activities namin ay pauwi din ako dito sa Davao City para maglibing ng uncle ko,” pahayag sang bise-presidente.
Ini nga NBI investigation ang nagatutok sa “kill remark” ni Sara batok sa president, first lady, kag house speaker. Sa isa ka press conference sang Nobyembre, ginpahayag ni Sara nga PANANGLITAN may magpatay sa iya, may ginsugo siya nga tawo agud patyon man si President Bongbong Marcos, First Lady Liza, kag House Speaker Martin Romualdez.
SUPORTA SANG IGLESIA NI CRISTO
Una na nga nag-anunsyo ang religious group nga Iglesia Ni Cristo (INC) nga magapatigayon sila sang rally agud nga pamatukan ang impeachment complaints batok kay Sara.
Sabat ni Sara, “Naiintindihan ko na gusto ng INC ng kapayapaan sa ating bansa dahil alam nila na kapag merong kapayapaan susunod din ‘yung kaunlaran ng ating bansa kaya naintindihan ko ‘yung pagsuporta nila sa opisina ng ating Pangulo, sa opisina ng Office of the Vice President kasi ‘yun din naman ang gusto ng lahat ng mga kababayan natin na mayroong kapayapaan at merong tuluy-tuloy na kaunlaran sa ating bansa.”#
