Magasugod na ang open sidewalk sa Iloilo City sa Disyembre 18 tubtob 31.
Ini ang nangin posible paagi sa Executive Order 159 nga gin-isyu ni Iloilo City Mayor Jerry Treñas.
Ang designated areas amo ang porsyon sang Iznart, JM Basa, Ledesma, Valeria kag Delgado Sts., sa City Proper; sa kilid sa Jaro Cathedral sa Jaro; Jocsin St. sa kilid sang St. Anne Parish sa Molo;kag sa tabok sang building sang Civil Service Commission sa Mandurriao.
Sa interview sang Bombo Radyo kay Retired Police Colonel Uldarico Garbanzos, pinuno sang Iloilo City Traffic Management Unit, iya ginpahayag gina-finalize na subong ang pagplastar sang mga stalls.
Suno kay Garbanzos, may ibutang man sila nga mga markings agud indi tuman nga maka-obstruct ang mga stalls sa sidewalk.
Nahibaluan nga kapin 400 ka mga sidewalk vendor ang mahatagan sang kahigayunan nga makabaligya apang nagakinahanglan anay nga magkuha sang nagakaigo nga permit sa city hall.
Pangitaan naman sang paagi sang syudad nga indi mangin huol ang ginakay-o nga mga dalan partikular sa JM Basa paagi sa pagbutang sang steel plate.
