Gin-ulan sang kritisismo ang FIFA ukon ang world governing body sang football matapos gin-anunsyo nga ang Saudi Arabia ang maga-host sang 2034 World Cup.
Sentro sang kahangawa sang mga grupo amo ang human rights record sang Saudi partikular na ang mga ebidensya nga nagatudlo kay Crown Prince Mohammed bin Salman nga may ginmandu nga torture, mass executions kag forced disappearances.
Base sa Human Rights Watch, ang hosting documents sang Saudi Arabia ang nagapakita sang plano sini sa kun paano preparahan ang World Cup. Lakip diri ang pagtukod sang 11 ka bag-o nga stadiums, masobra 185,000 ka bag-o nga hotel rooms, kag pagpasangkad pa sang mga imprastraktura lakip na ang dalan kag paluparan.
Ginakahangaw-an sang mga grupo nga mabutang sa alang-alang ang kabuhi sang construction workers kag iban pa nga migrant workers.
Nagsulat naman ang Human Rights Watch — kaupod ang 10 ka iban pa nga rights groups kag labor organizations lakip na ang Amnesty International and Football Supporters Europe — sa law firm nga naga-produce sang report para sa Saudi federation nga mapaguwa man ang ila nga concerns.
“As global and regional human rights organizations, trade unions, fans groups and organizations representing migrant workers, many of us have long highlighted the severe risks posed by Saudi Arabia’s hosting of mega-sporting events,” kabahin pa sang statement nga ginpaguwa sang grupo.
“By awarding the 2034 World Cup to Saudi Arabia without meaningful protections, FIFA has today decided both to ignore our warnings and discard its own human rights policies.”
Antes ang World Cup, naga-host naman ang Kingdom sa high-profile events kaangay sa Formula One, heavyweight boxing kag WTA Finals. Gina-akusaran man ini sang “sportswashing” — ukon ang termino kun sa diin ginagamit ang sports agud maliso ang atensyon sang publiko kun ano ang ila record sa paglapas sa kinamatarong sang mga tawo.
Indi ini ang una nga tion nga kontrobersyal ang pag-host sang nasyon sang FIFA World Cup bangud ginkwestyon man anay ang Russia kag Qatar nga pareho man nga may kontrobersyal nga record sa human rights. Sang 2022, ginpatigayon ang tournament sa Qatar nga gin-ulan man sang kritisismo bangud sa pagtratar sini sa migrant workers.
