Magapatigayon ang Sangguniang Panlalawigan sang committee hearing agud istoryahan ang reklamo sang mga motorista sa nagakahulog nga mga debris halin sa Ungka flyover.
Sa interview sang Bombo Radyo kay Iloilo 4th District Board Member Rolando Distura, chairman sang Committee on Infrastructure, iya ginpahayag nga imbitaron sa hearing ang Department of Public Works and Highways, kontraktor nga International Builders Corporation, kag ang mga motorista nga nagreklamo nga nahulugan sang debris.
Suno kay Distura, hibaluon man nila ang update sa rectification sa flyover ilabi na nga natalana na ini nga magbukas in full capacity sa Disyembre 25,2024.
Natalana ang hearing sa Lunes, Disyembre 16, 1:30 sang hapon.
Sa interview naman sang Bombo Radyo kay DPWH Region Director Engr. Sanny Boy Oropel, wala sini nagbuya sang pahayag kun magatambong sila sa hearing ukon indi.
Nagpangabay man ini sa mga motorista nga nahulugan sang debris nga magkadto sa field office sa idalom sang flyover agud magreklamo.
