Mangin mas ‘merry’ na gid ang Paskwa sang mga empleyado sang Iloilo Provincial Government bangud mabaton na subong nga Disyembre ang P47,000 nga incentives.
Sang damlag lang, naaprubahan sang Sangguniang Panlalawigan ang Appropriation Ordinance No. 2024-04 kag Approrpiation Ordinance No. 2024-05 —- ang ordinansa nga naga-authorize sang supplemental budget no. 3 kag no. 4 para sa Collective Negotiation Agreement Incentive nga P22,000, Service Recognition Incentive nga P20,000 kag Productivity Enhancement Incentive nga P5,000.
Sa interview sang Bombo Radyo kay Iloilo 4th District Board Member Domingo Oso Jr., Chairman sang Committee on Appropriations, iya ginpahayag nga pirmado na niya ang appropriation ordinance kag hulaton na lang ang pirma ni Governor Arthur Defensor Jr. agud nga mahatag na sang Provincial Treasurer.
Suno kay Oso, mahatag ang incentives sa mga empleyado antes magtakop ang tuig 2024 bangud base sa guidelines sang Department of Budget and Management, kinahanglan ihatag ang incentives nga indi maglapaw sa Disyembre 31, 2024.
Base naman sa nangin pahayag sang Association of Iloilo Provincial Government Employees, P15,000 lang kuntani ang Collective Negotiation Incentive nga mabaton sang mga empleyado apang naghimo sang position paper ang mga mga employees halin sa Rep. Pedro G. Trono Memorial Hospital sa Guimbal nga nagahingyo sang dugang nga pondo.
Bangud sini, ginpakig-angotan sang gobernador ang Department of Budget and Management kag ginpaboran sang ahenya ang request sang mga empleyado rason nga gindugangan ang P15,000 sang P7,000 nga nangin P22,000.
Nahibaluan nga ang makabaton sang kabug-usan nga P47,000 incentives amo ang mga regular, casual, contractual, appointive kag elective officials sang Iloilo Provincial Government.
Ang mga job hires kag contract of service workers naman ang magabaton sang gratuity pay.
