May isa ka babaye nga nagpasaka sang reklamo batok sa iya bana bangud sa kaugot nga may iban ini nga ginapalangga, ginatatap, kag ginahikap-hikap.
Ang problema ugaling, indi tawo ang ginapangimunan sang asawa kundi isa ka kuring!
Ginpasaka ang complaint sa Karnataka High Court sa syudad sang Bengaluru sa India.
Suno sa asawa, mas nagahatag sang tiyempo kag pagtatap ang iya bana sa ila hinuptanan nga kuring sa baylo nga siya nga asawa sini ang atipanon.
Kun ginakumpronta sini ang iya bana, ginaalegar nga naga-resulta ini sa pagbaisay kag gina-insulto pa siya.
Ang malain pa suno sa asawa, pila ka beses naman siya nga ginakaros sang kuring kag wala man sang ginahimo ang iya bana.
Suno naman kay Justice M. Nagaprasanna, wala man sang specific allegations ang asawa natuhoy sa pagpang-harass sang iya bana kundi naga-focus lang gid sa iya kalain sang buot bangud sa ila nga kuring. Suno pa sa natungdan, indi isyu diri ang demand sa pagbayad sa damage bangud sa pagpamintas sang bana. Sa baylo, ang isyu amo ang sagod nga kuring nga nagapangaros sang pila na ka beses.
“The complaint is a narration of marriage and living together, but the crux of the allegation is founded upon the squabble regarding a pet cat that is in the house of the husband,” pahayag ni Justice Nagaprasanna. “The allegation is that the husband takes care of the cat more than the wife.”
Matapos nabasahan ang indi kinaandan nga petisyon, wala na ginpadayon sang korte ang imbestigasyon batok sa bana. Sa baylo, ginsaway pa ang asawa bangud sa iya complaint nga ginakabig sang korte nga “minor domestic issue.”
Gindugang sang korte nga amo sini nga sahi sang mga petisyon ang rason kun ngaa naga-clog ukon nagasalalampaw ang dapat nga asikasuhon sa mga korte sa India.
“It is such frivolous cases that have clogged the criminal justice system today, and if the investigation is permitted in the case at hand, it would add one more case to the already clogged justice system,” suno pa sa korte.#
