Balantayan na alas nueve karon sa gab-i ang hampang sang Philippine Men’s National Football team batok sa powerhouse nga Thailand sa Leg 1 sang semifinals sa ASEAN championships.
Apisar seven-time ASEAN champions ang kasumpong, hingalitan sang Pilipinas ang suporta sang Filipino football fans bangud patigayunon ang hampang sa Rizal Memorial Stadium sa Manila.
Pang-150 ang Pilipinas sa world ranking kag nakasulod sa semis matapos ang 1-0 draw batok sa Indonesia sa Group B. Sa pihak nga bahin, rank 97 naman ang Thailand kag may matinlo pa nga 4-0 record sa Group A.
Mabudlay ang banas para sa mga Pinoy ilabi na bangud indi makahampang ang captain sini nga si Amani Aguinaldo bangud sa natipon nga yellow cards sa group stage.
Wala man si vice-captain Patrick Reichelt nga nag-anunsyo sang iya pag-retiro na sa national team sang nagligad lamang nga adlaw agud mas pasulabihon ang iya pamilya.
Ang nagdugang para sa Philippine team amo ang 20-anyos nga winger nga si Santi Rublico nga ulihi nakahampang sa 2024 King’s Cup sa Thailand sang nagligad nga Oktubre.
Tinguhaon sang team nga makahimo sang upset batok sa Thais. Sa nagligad nga lima ka beses nila nga pag-atubangay sa regional tournaments, isa ka tion lamang nga halos nagpalapit ang Pilipinas sa Thailand nga amo ang 1-1 draw sa 2018 AFF Suzuki Cup.
Pagkatapos ma-enjoy ang home-field advantage karon sa gab-i, mangayaw naman ang mga Pinoy sa Thailand para sa second leg sang semis sa Rajamangala National Stadium sa Bangkok.
Nahibaluan nga 2018 pa sang katapusan nga nakatapak ang Philippine team sa semifinals sang ASEAN Championships.
