Padayon nga nagasaka ang numero sang inbound kag outbound passengers nga nagapauli sa ila tagsa ka mga probinsya sa Western Visayas subong nga nagahilapit na ang bag-ong tuig.
Sa interview sang Bombo Radyo kay Commander Rechard Gura, Chief of Staff sang Coast Guard District – Western Visayas, iya ginpahayag nga na-record sang ila talatapan ang masobra 240,000 ka outbound passengers ukon nagguwa sa Western Visayas.
Samtang, masobra 238,000 naman ang na-record nga inbound passengers ukon ang nagsulod ukon nagpauli sa rehiyon subong nga holiday season.
Suno kay Gura, nabalhag kahapon nga adlaw, Disyembre 27, 2024, ang 7,561 ka outbound passengers, samtang 6,593 naman ang inbound passengers.
Gin-athag man sang natungdan nga sa subong, wala pa sang recorded nga maritime related incidents.
Una na nga nagpahayag ang Coast Guard District – Western Visayas nga naka- heightened alert status sila subong nga holidays agud nga mapabilin nga malinong kag matawhay ang tagsa ka mga pwerto, paluparan, kag mga terminals.
Naghingagaw naman pauli sa isla sang Guimaras ang pila ka mga pasahero sa Parola Wharf agud makaupod ang ila pamilya sa pagsug-alaw sang bag-ong tuig.
Suno kay Ausevia Hisona, pasahero sa Parola Wharf, iya ginpahayag nga magapauli siya sa banwa sang Buenavista, Guimaras kaupod ang iya duha ka mga apo.
Pahayag ni Hisona, gin-imbitar siya sang iya anak nga magselebrar sang bag-ong tuig kaupod man ang iya nga pamilya rason nga naghingaw ini tabok pa-Guimaras.
Ginlaragway man sini nga matawhay pa sa subong ang dalagan sang mga pasahero sa wharf kag nagalaum nga madasig siya makaabot sa balay sang iya anak.
Naghalin si Hisona sa Dumangas kag mas ginpili nga magsug-ulaw sang bag-ong tuig sa Guimaras bangud sang nagligad nga tuig, ang iya anak man ang nagbisita sa iya sa Dumangas agud magselebar sang new year.
