Ginpaidalom sa Code White Alert ang tanan nga mga district hospitals sa Iloilo sa pagsug-alaw sang bag-ong tuig.
Sa interview sang Bombo Radyo kay Dr. Paz Calopiz, head sang Iloilo Hospital Management Office, iya ginpahayag nga ang tanan nga health workers kaangay sang general kag orthopedic surgeons, anesthesiologists, internists, operating room nurses, ophthalmologists nga stationed sa ospital ang naka-standby ukon handa nga magresponde sa medical emergencies ano man nga oras subong.
Suno kay Dr. Calopiz, antes pa man ang holiday season, ginasiguro na sang Hospital Management Office nga bastante ang mga supplies kag equipment sa sulod sang ospital kaangay sang mga Intravenous therapy ukon IV fluids kag iban pa.
Pahayag pa niya, makaakomodar ang outpatient department sa office hours samtang yara man ang emergency room kag triage nga mahimo makaakomodar sa mga pasyente sa tion nga magdamo gid.
Sa pagkamatuod dugang ni Dr. Calopiz, nagnubo ang numero sang hospital beds bangud madamo sang mga pasyente nga indi pa ma-discharge.
Apang ginpasalig sini nga indi man overflowing ang mga pasyente kag may mga hospital beds pa nga available sa tion nga kinahanglan gid i-confine ang biktima.
Nagalaum ang natungdan nga magluwas sa mga firework-related injury, wala lang kuntani sang mabiktima sang nagtalang nga bala.
– 𝗪𝗶𝘁𝗵 𝗮 𝗿𝗲𝗽𝗼𝗿𝘁 𝗳𝗿𝗼𝗺 𝗕𝗼𝗺𝗯𝗼 𝗟𝘆𝗻𝗱-𝗖 𝗝𝗼𝘆 𝗕𝗮𝗱𝗲
