Nagpatuman ang Philippine Health Insurance Corporation (PhilHealth) sang 50% nga pagsaka sang ginabanta 9,000 ka health packages bisan pa nga wala ini sang subsidiya halin sa gobyerno para subong nga tuig.
Suno kay Israel Pargas, PhilHealth Senior Vice President for Health and Finance Policy Sector, ini nga increase ang maga-cover sang hospital admissions umpisa sa Enero 1, 2025.
Base sa PhilHealth Circular No. 2024-0037, ginhimo ang tikang agud nga mapataas pa ang suporta kag financial risk protection, mabuhinan ang out-of-pocket payment, kag mapasigurado ang epektibo nga pag-deliver sang dekalidad nga serbisyo sa ikaayong-lawas.
Isa sa mga package nga may ginpasakaan nga benepisyo amo ang treatment sang low-risk pneumonia. Iga-cover na subong sang state health insurers ang tubtub sa P29,250 halin sa nauna nga offer nga P19,500.
Sa pihak nga bahin, masobra 50% naman ang isaka sa coverage para sa kidney transplants kag angioplasty para sa atake sa korason.
Kun sang una, P600,000 ang kidney transplantation package, nagalab-ot na ini subong sa P800,000 tubtub sa P2 million benefits package. Ang angioplasty naman nga P30,000 benefit sang una nga package, nagalab-ot na subong sa P530,000.
Sang Pebrero 2024, matandaan nga nagpatuman man ang PhilHealth sang tubtub 30% nga pagsaka sa tanan nga benefit case packages para nga mabuhinan ang gasto sang mga Pilipino kun may ma-ospital.
Zero subsidy ang nabaton sang PhilHealth sa idalom sang 2025 national budget bangud ginpahayag sa bicameral conference committee nga may P600 billion pa sa reserve funds sini nga mahimo magamit.
