Napaslawan ang Iloilo City Police Office nga makumbinsi si Iloilo City Mayor Jerry Treñas nga magpasugot sa ila hingyo nga magpatuman sang signal jamming sa Dinagyang Festival 2025.
Sa interview sang Bombo Radyo kay Miss Joy Facinal Fantilaga, spokesperson ni Iloilo City Mayor Jerry Treñas, iya ginpahayag nga nagapanindugan gid ang alkalde nga indi kinahanglan sang signal jamming para lang masiguro ang seguridad sang publiko sa tunga sang kahiwatan.
Suno kay Fantilaga, dako man ang pagsalig sang alkalde sa kapulisan nga makapatuman sila sang security measures sa iban nga pamaagi magluwas sa signal jamming.
Nahibaluan nga isa sa argumento sang alcalde kun ngaa indi ini pabor sa signal jamming amo ang natabo sang 2023 kun sa diin indi lang ang syudad ang apektado bangud nadulaan man sang signal ang kaiping nga mga banwa kag mangin ang Guimaras.
Samtang, bukas naman ang Iloilo City Council sa posibilidad nga pamatian ang hingyo sang Iloilo City Police Office nga magpatuman sang signal jamming sa Dinagyang Festival.
Sa interview sang Bombo Radyo kay Councilor Atty. Sedfrey Cabaluna, chairman sang Committee on Public Safety, iya ginpahayag nga kun may yara gid man sang device para sa signal jamming nga masiguro nga sa partikular nga area lamang madulaan sang signal, hatagan ini sang konsiderasyon sang konseho.
Suno kay Cabaluna, sa pagkamatuod, bisan wala sang signal jamming sang nagligad nga tuig, nasarangan man sang kapulisan nga mapabilin nga safe ang publiko sa kabilugan nga mga aktibidad sa festival.
Gintuad naman sang konsehal nga wala pa sila sang nabaton nga letter of request para sa signal jamming halin sa Iloilo City Police Office.
