May gindihon nga proposal ang Committee on Transportation sang City Council kaupod ang mga stakeholders para solusyunan ang magutok nga sitwasyon sang trapiko sa syudad.
Sa interview sang Bombo Radyo kay Councilor Atty. Sedfrey Cabaluna, iya ginpahayag nga sa 22 ka mga ginakabig nga choke areas sa syudad, tatlo ka chokepoints ang ila tutukan sa amo nga proposal.
Ini ginalakipan sang Tagbak, Jaro malapit sa terminal; Atrium/Capitol Area/Arroyo Fountain; kag Molo Plaza.
Suno kay Cabaluna, kabahin sang mga proposals ang pag-convert sang pila ka one- way streets agud mangin two-way.
Nahibaluan nga isa ka public hearing kag consultation ang ginpatigayon para sa traffic management plan kun sa diin kaupod diri ang City Planning and Development Office, Traffic and Transportation Management Office (TTMO) kag iban pa.
Natapos na ang public hearing para sa proposed scheme sa Tagbak, Jaro malapit sa terminal kag Atrium/Capitol Area/Arroyo Fountain.
Igasunod naman ang Molo Plaza sa masunod nga mga inadlaw para sa consultation sa mga apektado nga mga sektor ilabi na ang riding public.
