Ginakonsiderar na sang National Price Coordinating Council (NCPP) ang pagdeklarar sang indi kinaandan nga pagsaka sa presyo sang pagkaon nga amo ang mangin lyabe agud nga maka-deklarar man ang Department of Agriculture (DA) sang food security emergency.
Sa hearing sang Quinta Committee sa Kamara ukon ang Murang Pagkain Supercommittee, ginpahayag ni Department of Trade and Industry (DTI)-Consumer Protection and Advocacy Bureau officer in charge Director Cherryl Carbonell nga nakasapol na ang council kag nagahimo na subong sang resolusyon.
Isa si Carbonell sa mga resource person sa amo nga committee kun sa diin gindiskusyunan ang mataas nga presyo sang mga balaklon sa mercado.
Pahayag sini, sang tion sang ila meeting, yara mismo si Agriculture Secretary Francisco Tiu Laurel Jr. kag iban pa nga ranking officials sang DA.
Ginkumpirma man sini nga may nakasugtan ang mga tawo nagtambong sa meeting nga may nakit-an gid man nga emerhensya sa sitwasyon subong sa Pilipinas bangud sa kamahal sang mga balaklon.
Sa idalom sang Republic Act (RA) 12708 ukon ang Agricultural Tariffication Act nga ginpirmahan ni President Ferdinand Marcos Jr. sang Disyembre 2024, mahimo makadeklarar ang DA secretary sang food security emergency bilang sabat sa kakulangan sa suplay sang bugas kag kun may makit-an nga tuman nga pagsaka sa presyo sini.
Ang NPCC amo lamang ang may gahum nga maka-advise sa DA secretary kun malab-ot ini nga duha ka kondisyon kag kun pwede na sila makadeklarar sang emerhensya sa sitwasyon.
