Nakaalerto ang Iloilo City Drug Enforcement Unit (CDEU) subong nga nagahilapit ang Dinagyang Festival 2025 agud nga indi magamit ang kahiwatan sa iligal nga druga.
Sa interview sang Bombo Radyo kay Police Captain Ryan Christ Inot, head sang City Drug Enforcement Unit, iya ginpahayag nga padayon ang ila monitoring sa mga lugar nga mahimo gamiton agud makasulod ang iligal nga druga sa syudad.
Suno kay Inot, doblehon sang talatapan ang effort agud nga indi madismaya ang mga Ilonggo sa pagselebrar sang Dinagyang Festival.
Wala naman ginadula sang natungdan ang posibilidad nga gamiton sang mga durugista ang kahiwatan agud mangin oportunidad sa pagbaligya sang illegal drugs.
Lakip naman ang Bakhaw, Mandurriao kag mga balay-ilimnan sa mga ginabantayan sang otoridad nga mahimo pahamtangan sang mga durugista sa pag-execute sang iligal nga mga aktibidad.
