Nagpain ang Department of Agriculture (DA) sang P1.25 billion agud mabuligan ang hog industry nga makabangon sa African swine fever (ASF) ilabi na bangud nagapanglakaak sa gihapon ang presyo sang karne sang baboy bangud sa limitado nga suplay.
Sa gin-isyu ni Agriculture Secretary Francisco Tiu Laurel Jr. nga Memorandum Circular No. 2, nakasaad ang pag-implementar sang swine industry recovery project (SIRP) agud nga maduso ang modernisasyon sa swine industry.
Suno kay Laurel, tuyo sini nga programa nga mapabaskog ang biosecurity, mangin mas moderno ang farm infrastructure, mapaayo ang genetic quality kag mapasangkad ang market access.
Paagi sini suno sa natungdan, mas malapad ang malab-utan kaangay sang magagmay nga farmers, kooperatiba, commercial breeders, kag at-risk agricultural communities nga nagatanyag sang customized assistance nga maka-restore, modernize kag maintain sang produksyon sang baboy sa bilog nga pungsod.
Ginbasol ni Laurel sa outbreak sang ASF kun ngaa nagnubo ang pork output, nagsaka ang presyo, kag naapektuhan ang mga consumer kag kabug-usan nga food supply chain.
Apang pahayag sini, ginalantaw niya nga maka-recover na ang suplay sang baboy sa pungsod sa masunod nga tatlo ka semana. Tapos na ang Christmas season suno sa natungdan gani nagnubo naman ang consumption, gani sa masunod nga duha-tatlo ka semana, magadamo na liwat ang suplay.
Sa Metro Manila, ang pork liempo yara na sa P370 – 450/kg; samtang ang kasim naman yara sa P330/kg-P400/kg base sa DA Bantay Presyo (price watch).
Bisan wala sang supply shortage sa pangkabug-usan suno sa DA, yara gihapon ang daku nga epekto sang ASF sa swine industry.
As of Dec. 27, 2024, 225 ang yara sa red zones ukon barangays nga may active ASF cases nga mas manubo sa 365 nga na-rekord sang Disyembre 6 sang tinalikdan nga tuig.
