Nalutos ang Miami Heat sa kamot sang Denver Nuggets, 133-113, kadungan sang pagbalik ni Jimmy Butler gikan sa suspension sa pito ka mga hampang.
Naka-skor ang 35-anyos nga forward sang 18 points sa 33 minutos sini nga paghampang para sa Heat sa Florida.
Antes ang aktwal nga hampang batok kay Nikola Jokic, ginsapubliko ni Butler ang iya pagbalik paagi lamang sa duha ka tinaga nga “I’m back.”
Nauna na nga ginhambal ni Butler nga indi siya malipayon subong nga regular season, pila ka beses na nga naghaboy sang kritisismo, kag nag-request sang trade. Enero 13 sang ginsuspend siya sang Heat bangud sa rason nga “conduct detrimental to the team.”
Bisan pa na-suspend, ginsulit sini nga luyag sini nga ma-trade sa iban nga team, apang sa iya pagbalik sa hampang, wala man sang tinimok-timok kag wala gid namensyonar ni Miami coach Erik Spoelstra ang pangalan sang Miami superstar.
Kun balikan ang isyu, nasapubliko ang tension sa tunga ni Butler kag Miami sang nakakas sa NBA playoffs ang Miami bangud sa Boston Celtics. Wala nakahampang si Butler sa five-game series bangud sa knee injury, kag gin-alegar nga nagpanginit ang team president nga si Pat Riley sang nagsiling si Butler nga nalutos kuntani nila ang Celtics kun nakahampang siya para sa team.
May nagaalegar man nga gusto ni Butler sang contract extension nga duha ka tuig nga $113 million max extension, apang wala sang plano ang Heat, rason nga diskuntento man ang six-time All-Star kag nagahingyo na sang trade.
May average si Butler nga 17.6 points, 5.4 rebounds kag 4.6 assists sa 23 games kag ini na ang pang-anum niya nga season sa Miami.
Sunod nga atubangon sang Miami ang San Antonio Spurs 4:00 buwas sa aga, oras sa Pilipinas.
