Nagpadala ang Estados Unidos sang carrier strike group sa West Philippine Sea agud magpatigayon sang una nga Maritime Cooperative Activity (MCA) sa 2025 upod ang mga pwersa sang Pilipino sa West Philippine Sea (WPS).
Suno kay Armed Forces of the Philippines spokesperson Colonel Xerxes Trinidad (PA), ang Maritime Cooperative Activity upod ang United States Indo-Pacific Command (USINDOPACOM) natabo sa Palawan area sadtong Enero 17-18.
Ginpahayag sang AFP nga ang aktibidad ang ginalakipan sang guided missile frigate BRP Antonio Luna (FF151), offshore patrol vessel BRP Andres Bonifacio (PS17), duha ka FA50 fighter aircraft, kag Philippine Air Force Search and Rescue (SAR) assets.
Nagabulig sa pwersa sang mga Pilipino amo ang isa ka US aircraft carrier strike group nga nakasentro sa USS Carl Vinson (CVN-70) kag ang air group sini. Gin-updan ini sang guided missile cruiser nga USS Princeton (CG-59), destroyer USS Sterett (DDG-104), isa ka MH-60 Seahawk helicopter, isa ka V-22 Osprey helicopter, kag duha ka F/A-18 Super Hornet fighter bomber.
Sang Enero 17, ginpahayag sang AFP nga ang gintingob nga pwersa nagpatigayon sang Communications Check Exercise (COMMEX), Division Tactics / Officer of the Watch (DIVTACS/OOW) maneuver, kag Photo Exercise (PHOTOEX). Ang mga exercises nagpadayon sang Enero 18 sa diin ang mga partisipante nagpatigayon sang Dissimilar Aircraft Combat Training (DACT).
Suno sa AFP, ang ikalima nga iteration sang Maritime Cooperative Activity upod sa Estados Unidos nagpabakod sang bilateral nga kooperasyon kag interoperability sa kadagatan.
