Ginapasangkad sang National Privacy Commission (NPC) ang kampanya sa social media awareness kag online protection.
Sa interview sang Bombo Radyo kay Juan Paolo Fajardo, ang deputy privacy commissioner sang NPC, iya ginpahayag nga kadungan sang nagataas nga numero sang mga content creators sa subong nga tinion, amo man nga nangin means of income na sang mga Pilipino ang pag-ubra sang content, importante nga mahatagan sang impormasyon ang publiko sa paggamit sang maayo sang social media.
Ini bangud, suno kay Fajardo, daw kaangay nga free and abandoned na nga ginabutang sang katawhan ang ila information online.
Pahayag niya, ang mga social media users ang dapat protektahan ang ila nga privacy lakip man nga dapat man sang mga ini nga protektahan ang privacy sang iban nga tao.
Pagpaathag ni Fajardo, indi pwede nga i-post online ang personal data sang isa ka tawo nga wala sang permission ukon proper justification sang data privacy act kung sa diin may mga special instances nga pwede maka-process ukon share sang personal data sang iban.
Ginpahayag man niya nga lakip sa ila kampanya ang ‘Kabataan Digital Program’ kung sa diin may Memorandum of Agreement sila sa Department of Education nga mag-produce sang educational materials, ukon content videos nga pagagamiton sang ahensya.
Ini agud makahatag sang edukasyon sa mga public schools halin sa elementary tubtob high school angut sa data privacy, responsibility, kag awareness sa paggamit sang social media.
Dugang niya, nga dapat dumdumon gid ang ‘Think before you Click’ agud malikawan ang mga peligro nga dala sang social media.
