Nakabiya na sa Pilipinas ang tanan nga Afghan nationals nga nagtinir anay diri sa pungsod samtang nagaproseso ang ila Special Immigrant Visas para makasulod sa Estados Unidos.
Suno sa US embassy, nagapasalamat sila sa suporta kag kooperasyon nga ginhatag sang Philippine government.
“The government of the United States extends deep appreciation to the government of the Philippines for their cooperation and support for U.S. efforts to assist Afghan Special Immigrants,” suno kay Kanishka Gangopadhyay, spokesperson sang embahada.
Enero 6 sang nag-abot ang halos 200 ka Afghan special immigrants diri sa pungsod apang wala ginsapubliko kun sa diin sila nagtinir.
Suno sa embassy, naghalin na sila padulong sa US sakay sa commercial flights sang Enero 15-17.
Sang tion nga gintugutan sila nga magtinir diri sa Pilipinas, madamo man ang nagkwestyon sa ila identity kag may mga kahangawa sa national security. Ginklaro sang Estados Unidos nga indi sila refugees kundi madugay na nga kaupod sang US forces sa Afghanistan.
Magasaylo sila sa US matapos ginkontrol sang Taliban ang Afghanistan sang 2021.
