Gintudlo sang chairman sang Committee on Transportation sang Iloilo City Council sa Land Transportation Franchising and Regulatory Board (LTFRB) ang responsibilidad agud maklaro ang nahanungod sa fixed rate sa mga taxis kun nagadul-ong sang pasahero sa gwa sang syudad.
May kaangtanan ini sa natabo sang damlag lang kun sa diin ginreklamo sang isa ka Cebuano vlogger nga ginsukot ini sang P600 sang taxi driver halin sa Mandurriao pakadto sa airport sa Cabatuan kag wala naggamit sang taxi meter ang driver.
Sa interview sang Bombo Radyo kay Councilor Sedfrey Cabaluna, iya ginpahayag nga indi lang sa Iloilo nagakatabo nga may fixed rate bangud nagakesister man ini sa iban nga lugar sa pungsod.
Suno kay Cabaluna, mas maayo nga matutukan ini sang regulatory board bangud madamo apektado diri ang madamo nga taxi drivers kag ang riding public.
Gindugan sang konsehal nga magapakig-angot man ini sa nasambit nga ahensya sang gobyerno agud makahatag man sang iya opinyon tuhoy diri.
