Nagpahanumdom ang Land Transportation Franchising and Regulatory Board sa drivers sang depampasahero nga mga salakyan nga indi mag-overcharge sa ila mga pasahero subong nga Dinagyang Festival.
Sa interview sang Bombo Radyo kay Atty. Salvador Altura Jr., Officer in Charge sang Land Transportation Franchising and Regulatory Board, iya ginpahayag nga maayo nga kahigayunan ang Dinagyang para nga makakita sang dako ang mga drivers bangud sa pagdugok sang mga turista apang indi ini rason agud nga magpamentaha.
Suno kay Altura, kinahanglan huna-hunaon sang mga drivers nga kun himuon nila ini, maguba ang imahe sang Iloilo City kag maumid man ang iban nga maayo nga drivers.
Nagpanugyan man ini sa publiko nga mangin vigilante gid kag i-report gilayon sa otoridad kun may yara sang driver nga nagapanukot sang tuman ka mahal nga lapaw na sa regular nga plete.
May kaangtanan naman sa nangin kontrobersyal nga post sang isa ka vlogger batok sa taxi driver nga nagsukot sa iya sang P600 kag wala naggamit sang taxi meter halin sa Mandurriao pakadto sa airport sa Cabatuan, ginpahayag ni Altura nga indi ini isolated case bangud madugay na gid man ini nga nagakatabo kag madamo na nga operators ang ila namultahan.
Baliskad ini sa pahayag ni Mr. Perfecto Yap, presidente sang Association of Taxi Operators of Panay, nga isa lang ini ka isolated nga kaso.
