Gin-anunsyo sang rebelde nga Houthis nga ginhilway na nila ang crew sang commercial vessel nga Galaxy Leader nga ila gin-hijack masobra isa ka tuig na ang nagligad.
Lakip sa ila gin-release amo ang 17 ka mga Pinoy seafarers.
Matandaan nga halin sang nag-ibwal ang giyera sa Gaza, ang Galaxy Leader amo ang isa sa una nga mga barko nga gin-atake sang Houthis sa southern Red Sea nga amo ang mayor nga alagyan sang trade sa tunga sang Asya kag Europa.
Suno kay Houthi leader Abdulmalik Al Houthi, siya ang nagmandu nga pagguwaon na ang seafarers. Ginpahayag nga gintugyan na sila sa Omani officials.
25 ang miyembro sang crew sang barko lakip ang 17 Filipinos, tatlo ka Ukrainians, duha ka Mexicans, duha ka Bulgarians kag isa ka Romanian.
Ginbanggaan ang ila barko sang Nobyembre 2023, pila sa mga seafarers ang na-ospital pa bangud sa malaria, kag ang iban naman ang gin-hostage sa Yemen nga amo ang pungsod kun sa diin naka-base ang Houthis.
Suno sa Houthi Supreme Council, ang ila desisyon nga hilwayon ang seafarers ang pagpakita sang suporta sa ceasefire agreement sang Israel kag Hamas nga nag-umpisa sang nagligad nga Domingo.
Nagpaguwa naman sang statement ang United Nations-International Maritime Organization nga nahaw-asan gid sila kasunod sang tikang sang Houthis — butang nga suno sa grupo nangin testamento sang gahum sang kolektibo nga diplomasiya kag dayalogo.
“Today’s breakthrough is a testament to the power of collective diplomacy and dialogue, recognizing that innocent seafarers must not become collateral victims in wider geopolitical tensions,” suno kay Arsenio Dominguez, secretary-general sang IMO. “It is also a return to operations in the Red Sea as we have been accustomed to, and upholding of the freedom of navigation.”
Ang Houthis amo ang mga rebelde nga nagakontrol sang north-western Yemen. Nag-umpisa sila sa pag-atake sa Israel kag sa international shipping matapos nag-umpisa ang giyera sa Gaza. Bangud sa ila atake, may mga seafarers nga napatay lakip na ang mga Pinoy, may napilasan, kag napilitan ang mga barko nga likawan ang southern Red Sea kag ang Gulf of Aden apisar nga amo kuntani ini ang ila pinakahapos kag pinakamalapit nga ruta.
Naglunsar man anay ang Israel sang serye sang air strike batok sa Houthis sang Hulyo bilang pagtimalos sa 400-milles kag drones nga ginpaulan man sang rebelde halin sa Yemen.
Sa statement sang Houthis sang weekend, ginsiling nila nga maga-untat na sila sa pag-atake sa mga barko nga naangot sa Israel, US kag UK matapos ang ceasefire agreement sa Gaza.#
