Mas labi nga nagbaskog suno kay Lanao del Sur Rep. Zia Alonto Adiong ang kaso sang prosekusyon batok kay Vice President Sara Duterte matapos nga nag-ako ang mismo testigo sang depensa nga may ara sang interes ang bise sa GenCorp Industries Inc.
Sa impeachment trial kahapon nga adlaw, ginpahayag ni Adiong nga ginkumpirma ni Suzette Balucanag-Punay, legal counsel sang GenCorp kag Metro City Chow Foods Corp., nga nakabaton si Duterte sang mga bayad halin sa kumpanya apisar wala ini nakalista bilang shareholder sa corporate records.
Suno kay Punay, nakabaton ang Bise Presidente sang kabug-usan nga ₱2.14 milyon halin sa 2022 tubtob 2025, samtang nagaserbe ini sa iya nga posisyon.
Ginlaragway man sini bilang pagbalik na sang iya nga kita halin sa isa ka investment sa Jollibee Times Square branch sa Davao City.
Ginpunto ni Adiong nga ang nasambit nga pag-ako ang naghalin mismo sa testigo nga ginpaatubang sang depensa kag indi sa bahin sang prosekusyon.
Dugang pa sini nga mapabaskog pa sini ang alegasyon sang mga violations sini sa Konstitusyon.
Samtang, nagpasalamat naman si Manila Rep. Joel Chua sa mga testigo sang depensa, nga suno pa sa iya nagadugang sa mga ebidensya nga ginapamatud-an sang prosekusyon.
Nahibaluan nga una na nga ginpanginwala ni Punay nga wala sang shares si Duterte sa GenCorp kag ginakilala naman sini ang investment sang Bise Presidente nga nag-umpisa sadtong 2007 nga sa dalayon lang nasaylo sa kumpanya.
Padayon naman nga nakabase sa pagbusisi sang mga ebidensya kag testimoniya sa impeachment proceedings ang paghibalo kun may natabo nga violations sa Konstitusyon.
