Ginbawian sang kabuhi ang isa sa walo ka mga indibidwal nga sakay sang Mitsubishi Mirage nga nakabunggo sa isa ka wing van truck sa Barangay Tacas, Jaro kaina sang kaagahon.
Ang napatay nga biktima amo si Rizalyn Anacan, residente sang Dumangas, Iloilo samtang ang driver naman sang salakyan amo si Joseph Anacan Sumagyo.
Sa interview sang Bombo Radyo kay PCol Andy Pava, traffic investigator, iya ginpahayag nga halin sa Mandurriao ang salakyan
samtang halin sa Buhang pakadto sa Tacas ang wing van truck.
Suno kay Pava, base sa nakakita, madasig ang dalagan sang Mitsubishi Mirage kag sang nag-overtake ini sa isa ka puck-up truck, wala ini nakabalik gilayon sa lane kag nakabunggo sa nagasugata nga truck.
Gindala naman sa ospital ang iban nga sakay sang Mitsubishi Mirage.
Wala pa matumod kun sa diin nga porsyon sang salakyan nagapungko ang napatay nga babaye.
