Magadangop si former Iloilo City Councilor Plaridel Nava II sa Supreme Court agud i- challenge ang executive clemency nga ginahatag ni Presidente Marcos kay former Iloilo City Mayor Jed Mabilog nga naangot sa administrative sanctions nahanungod sa kaso nga graft batok sa anay alkalde.
Sa interview sang Bombo Radyo kay Nava, iya ginpahayag nga maga-file siya sang petition for certiorari sa idalom sang Rule 65 sang Rules of Court agud kwestiyunon ang ginhatag nga clemency.
Suno kay Nava, ini may kaangtanan sa grave abuse of discretion nga naglab-ot sa kakulang ukon sobra sa hurisdiksyon batok sa Office of the President, amo man kay President Marcos, kag kay Executive Secretary Lucas Bersamin.
Ginpanindugan sang anay opisyal nga ang gahum sang Presidente nga maghatag sang pardon sa mga kaso- administratibo ang wala nagalakip sa mga kaso nga ginauyatan sang Office of the Ombdusman.
Ginhalimbawa sini ang Supreme Court ruling sa Rodolfo Llamas vs. Executive Secretary Oscar Orbos nga pareho man nga kaso nga gin-gamit sang Office of the President agud suportahan ang gahum sang Presidente nga mag-grant sang pardon sa mga administrative cases.
Pahayag sang natungdan, kun mag-grant ang Presidente sang executive clemency sa administrative cases, ang ginatumod diri amo lang ang administrative cases sa Executive branch, kag wala nalakip ang Judicial ukon Legislative nga sanga sang gobyerno.
Suno kay Nava, sa kaso sang Llamas vs. Orbos, ang Department of the Interior and Local Governance ang nagmando sang suspension kag pagkakas sa respondent kag indi ang Ombudsman kag ginpapag-on sang Supreme Court ang pardon bangud yara sa idalom sang president ang DILG.
Paathag niya, indi kabahin sang executive branch ang Ombudsman bangud independent ini nga constitutional body.
Ini suno sa iya ang nagakahulugan nga indi mapahilabtan sang executive branch ang desisyon sini paagi sa executive clemency bangud sa kakulang sa jurisdiction.
Matandaan nga gin-dismiss sang Office of the Ombudsman si Mabilog sang Oktubre 2017 bangud sa kontrobersyal nga kontrata sa isa ka towing firm kun sa diin ang dismissal ang may kaupod nga perpetual disqualification nga nagakahulugan nga indi ini makapadalagan sa eleksyon.
Ginpapag-on sang Court of Appeals ang dismissal order sang November 2017 kag, sang 2019 matapos liwat nga nag-apelar si Mabilog, ginpapag-on sang Supreme Court ang dismissal with finality.
Sa bahin naman sang Ombudsman, nag-file ini sang kriminal nga kaso nga graft batok kay Mabilog kun sa diin co-accused man si Nava, nga naangot sa towing contract sa Sandiganbayan sang 2023.
Sang nagbalik sa Pilipinas sang Septyembre 2024, nagbayad sang piyansa si Mabilog kag nag-apply para sa executive clemency nga sang ulihi, ginhatag ni Marcos.
