Nagapati ang isa ka Ilonggo vendor nga ginalakipan sang kapisan ang swerte sa pagpangabuhi agud malab-ot ang ginhandom sa kabuhi.
Sa interview sang Bombo Radyo kay Gudelia Velasco Coo, negosyante kag nakapamana sang Chinese, iya ginpahayag nga kada tuig nagapreparar gid siya agud nga magpakigbahin sa Chinese New Year Celebration kon sa diin, nagaluto kag nagabaligya siya sang Chinese delicacies.
Lakip na diri ang kiampong ukon valenciana sa Pilipinas, lumpia, tikoy, kag machang.
Para sa iya, nagahatag ini sang swerte agud nga mangin malapit sa isa kag isa ang tagsa ka myembro sang pamilya.
Suno kay Coo, bangud sa iya negosyo, napatapos niya ang iya tatlo ka mga anak nga sa subong, isa na ka abogado, engineer, kag teacher.
Nagapati man ang natungdan nga matuman lamang ang new year’s resolution kon may pagtinguha kag kapisan.
