Ginapanan-aw sang Department of Agriculture nga may matabo nga kakulangan sa suplay sang itlog sa Abril.
Suno sa ahensya, madamo nga producers ang nagdesisyon nga untaton ang ila nga operasyon kag pang-ihawon na lamang ang chicken layers sang 2024 bangud sa epekto sang tuman ka nubo nga farmgate price sang natabo ang oversupply.
Sang nagligad nga tuig, nag-us-os sa kuatro pesos kada bilog ang presyo sini gani daku gid ang napierde sa egg producers.
Pahayag ni Agriculture Secretary Francisco Tiu Laurel Jr., bangud gin-ihaw sang local producers ang layers para mabaylo sa cash, nagnubo naman ang populasyon sang nagapangitlog nga nga manok.
Nagalaum ang tiglikom nga indi magsaka ang presyo sang itlog sangsa presyo subong nga yara na sa P8-P9 kada bilog.
Nagpasalig ang ahensya nga may mga ginahimo na ini subong kaangay sang mass rollout sang avian influenza (AI) vaccines bisan nga wala man sang active or positive case sang highly pathogenic avian influenza (HPAI) sa Pilipinas subong.
Ini nga tikang ang ginahimo agud malikawan ang krisis kaangay sa Estados Unidos kun sa diin padayon nga naglapta ang bird flu lakip na rare strain nga H5N9.
Isa pa sa bulig sang DA amo ang pagtanyag sang assistance sa local producers nga gusto mag-import sang bag-o nga layers. Mahimo ini mapadasig suno sa secretary paagi sa pag-set-up sang meeting sa stakeholders.
Nagpanawagan man ang DA chief sa financial institutions nga suportahan ang local producers paagi sa pautang sa mga katapo sang egg industry agud mabuligan sila nga maka-repopulate.
