Nagsaka na sa 41 ka mga bangkay ang na-recover sang otoridad halin sa Potomac River matapos nga nagbungguanay ang isa ka passenger plane kag ang Army helicopter sa Washington D.C. sang nagligad nga Miyerkules sang gab-i.
28 sa mga biktima nga ini ang na-identify na suno sa Washington fire department.
Suno kay fire department head John Donnelly, nagalaum sila nga ma-recover ang 67 ka mga bangkay apang indi ini sigurado kun san-o matapos ang recovery operation.
Ginalauman man nila nga magaabot sa weekend ang mas maayo nga salvage equipment agud nga makakas sang crew ang passenger plane kag ang helicopter halin sa madalom nga tubig kag matigayon nila nga ma-retrieve ang iban nga mga lawas sang mga pasahero.
Magluwas sa tatlo ka soldado nga patay, ang talalupangdon nga nagkalamatay sa insidente amo ang piloto nga kalaslon, isa ka estudyante nga mabalik sa eskwelahan matapos nagkadto sa funeral, isa ka abogado nga mapauli kuntani para sa iya birthday, grupo sang teenage figure skaters, ila ginikanan kag coaches kag may duha man ka Chinese citizens.
Lakip man sa amo nga flight si Police Col. Pergentino Malabed Jr., chief sang PNP Supply Management Division.
Ang 51-anyos nga pulis ang yara sa official travel sang natabo ang insidente. May yara ini sang foreign travel authority para magkadto sa India para sa inspection sang 2,675 nga armored vests nga pagabaklon sang PNP.
Nakaabot ini sa India sang January 22 kag nagkadto sa US shop para sa final testing kuntani sang vests. Halin sa Kansas, natalana ini kuntani nga mag-courtesy call kay Police Attache Colonel Moises Villaceran Jr. sa Washington D.C.
Ang pagkalakip ni Malabed sa casualties sa amo nga aviation tragedy ang una na nga ginkumpirma sang PNP kahapon, Enero 31.#
