Puno sang kalipay ang Pinoy pole vault superstar nga si Ernest John “EJ” Obiena bangud wala na ini sang nabatyagan nga kasakit sa iya likod sang nagbalik ini sa international competition subong nga 2025.
Nagpangaduha si Obiena sa International Jump Meeting Cottbus sa Germany sang nagligad nga semana nga amo ang iya una nga medalya halin sang nakaangkon ang back injury nga amo ang nag-utod sang iya produktibo nga 2024 season.
Pahayag sang two-time Olympian, na-clear na ang iya injury sang Oktubre kag amat-amat siya nga nagabalik sa kasakuon sang sports lakip na ang wala-tuo nga training.
Positibo man siya sa iya mga plano subong nga tuig lakip ang pagpasakop sa World Indoor Championships sa China sa Marso; Asian Championships sa Korea sa Mayo; sa World Outdoor Championship sa Japan sa Septyembre; kag sa Southeast Asian Games sa Thailand sa Disyembre kun sa diin natalana sini nga depensahan ang iya titulo.
Matandaan nga antes pa man ang Paris Olympics, may ginabatas na ini nga injury apang nag-compete gihapon kag nagpang-apat sa kumpetisyon.
Halin sa world no. 2 nga ranking, nag-us-os ini subong sa pang-apat nga pwesto.
