Nagpabutyag sang kahangawa ang duha ka dalagku nga business groups kaangot sa ginaduso nga P200 daily minimum wage increase para sa pribado nga sector sa pungsod.
Suno kay Cecilio Pedro, presidente sang Federation of Filipino-Chinese Chambers of Commerce and Industry, ang mataas nga sweldo magaresulta man sa mataas nga presyo sang mga balaklon nga amo ang mangin palas-anon sang mga consumer.
Naghingyo ini sa National Wages and Productivity Commission nga irepaso gid sang maid-id ang proposal.
Sa pihak nga bahin, si Philippine Chamber of Commerce and Industry (PCCI) Chairperson George Barcelon ang may kaangay man nga concern bangud suno sa iya, ang wage increase ang makabuhin sang competitiveness sa pungsod kag mapwersa pa ang mga negosyo nga mangbuhin sang empleyado.
Ini nga hagna para sa P200 across-the-board wage hike ang aprubado na sang House Committee on Labor and Employment.
Base sa pahayag ni House Deputy Speaker Rep. Democrito Raymond Mendoza nga co-author sang measure, ang wage increase ang makabulig sa ginabanta nga 5 million minimum wage workers nga tuman nga nagapamigado.
