Wala sa gihapon nakapyansa ang tatlo ka mga pangayaw nga nagpangawat sang mga cellphones kag wallet sang Dinagyang Festival 2025 sa Iloilo City.
Ang mga kawatan amo ang mag live-in partner nga sanday alyas Maricar kag alyas Alog; ang ila financer nga si alyas Kevin; kag ang isa ka menor de edad nga upod nga yara sa paghinakop sang City Social Welfare Development Office (CSWDO) kag ini sila tanan lunsay taga Tondo, Manila.
Sa interview sang Bombo Radyo kay Police Captain Ryan Christ Inot, hepe sang Iloilo City Police Station 4, iya ginpahayag nga nag-abot na sa Iloilo City ang abogado sang nasambit nga mga kawatan sang Enero 30.
Apang tubtob subong, wala sa gihapon natapos ang mga papeles sang mga kawatan.
Suno kay Inot, posible organisado nga grupo ang mga kawatan rason nga makasarang ini sila mag hire sang pribado nga abogado.
Ang mga kawatan ang nagapangatubang sa subong sang mga kaso nga paglapas sa
Presidential Decree 1612 ukon Anti-Fencing law kag paglapas sa Section 11 sang Republic Act 9165 ukon Comprehensive Dangerous Drugs Act of 2002, ini matapos makuhaan man sila sang illegal nga droga.
Sa subong, padayon pa nga pagpangita sang mga kapulisan sa apat nila ka mga kaupdanan.
