Gin-abi-abi sang Bangsamoro Autonomous Region in Muslim Mindanao (BARMM) ang pag-apruba sang kongreso sang bag-o nga petsa sang pinakauna sini nga parliamentary elections nga magahatag sang alagyan para sa transisyon sang ginbungkag nga Autonomous Region in Muslim Mindanao.
Base sa statement sang BARMM, ang ini nga legislative measure nga gin-certify bilang urgent ni President Ferdinand R. Marcos Jr., ang nagapakita sang pagkinahanglan nga mapasiguro ang talunsay kag preparado nga transition antes magpatigayon ang rehiyon sang labing una sini nga parliamentary elections.
Dugang sang BARMM, ang pagpaiway sang election ang importante nga tikang agud bug-os nga mapatuman ang nabilin nga mga aspeto sang transition plan, kalakip na ang key governance reforms kag ang institutionalization sang mga structures nga ginamando sang Bangsamoro Organic Law (BOL) kag Comprehensive Agreement on the Bangsamoro (CAB).
Nahibaluan nga ginsapinal sang bicameral conference committee ang hagna nga naga- postpone sang pinakauna nga BARMM parliamentary election halin sa Mayo 12 kag ginhimo nga Oktubre 13, 2025.
Sa bicameral meeting, ginsiling ni Senate President Francis “Chiz” Escudero nga gin-adoptar sang Senado ang mga probisyon sa House version nga nagaathag nga ang polls ang mangin automated kag ang BARMM government ang tutugan nga maggasto para sa Sulu apisar nga wala ini nalakip sa rehiyon.
Sang Marso 2023, ginpasar sang Bangsamoro Transition Authority ang Bangsamoro Electoral Code, nga nagatugot sa democratic participation sa local kag regional elections.
Ini magabukas man sang pagtukod sang political parties sa rehiyon nga may representasyon halin sa babaye, pamatan-on, indigenous people, settler communities, traditional leaders, kag Ulama.
Ang parliamentary polls sang BARMM ang natabo na kuntani sang Mayo 2022 apang na- postpone bangud sa COVID-19 pandemic.
