Nagpanawagan ang Catholic bishops sa idalom sang Caritas Philippines nga dapat itib-ong ang kamatuoran kag siguruhon nga mangibabaw ang hustisya.
Statement ini sang Caritas matapos gin-impeach sang Kamara si Vice President Sara Duterte kahapon, Pebrero 5.
Suno kay Caritas Philippines president Bishop Jose Colin Bagaforo, ang impeachment process nagaserbe bilang importante nga mekanismo sa demokrasya para nga mapabilin ang accountability sang mga tawo sa pwesto.
“This demonstrates that our democratic institutions are functioning as intended. No leader should be beyond scrutiny, and governance must always serve the common good,” suno sa statement ni Bishop Bagaforo.
Nagpanawagan man ini sa mga Katoliko kag sa nagkalain-lain nga sector sang sosyudad nga magpangamuyo kag mangin aktibo sa pagpangapin sang mga prinsipyo para sa demokrasya. Nagpangabay man ini nga indi pagtugutan ang politika nga amo ang magapangibabaw sangsa ikaayo sang mga tawo.
Pahayag pa sini, mas maayo nga hangpon sang mga tawo ang impeachment proceedings nga may integridad, pagka-patas, kag may respeto sa layi.
“We must not let political divisions overshadow our primary concern: the welfare of our people. Leadership requires responsible governance, just allocation of resources, and equal access to justice,” dugang sini. “As we navigate this critical period, let us work together to build a society that upholds truth, justice, and the dignity of every Filipino.”
Ang Caritas Philippines amo ang social action arm sang Catholic Bishops’ Conference of the Philippines (CBCP).
Yara na subong sa Senado ang bola kun ano ang himuon kasunod sang pag-impeach sang lower chamber sa bise-presidente. Nagtakop ang plenary sessions sa Kongreso kahapon para sa midterm elections kag natalana nga mag-resume sa Hunyo 2.
