Nagpanawagan si Negros Oriental 3rd District Rep. Janice Degamo sang paathag kaangot sa ginaalegar pagbisita ni Vice President Sara Duterte kay anay congressman Arnolfo “Arnie” Teves Jr., nga ginatudlo utok sa pagpatay sa iya bana nga si anay Gov. Roel Degamo.
Ginpahayag nga natabo ang pagbisita sa Camp Bagong Diwa sa Taguig City sang 2025, apang wala pa ini ginkumpirma ukon ginpanginwala sang Bise Presidente.
Sa hearing sang House Committee on Justice sa impeachment complaints batok kay Sara Duterte, ginpamilit ni Degamo nga dapat may paathag halin kay Duterte ilabi na nga may alegasyon nga may kaangtanan ang pagbisita niya sa tuyo nga pagpanakit kay Ramil Madriaga, isa ka testigo sa impeachment proceedings nga napreso sa amo man nga pasilidad.
Suno kay Degamo, importante ang kamatuoran kag salabton ilabi na para sa mga pamilya nga biktima sang kalakasan sa politika.
Samtang, ginsiling ni National Bureau of Investigation (NBI) Director Melvin Matibag sa hearing nga base sa ila nga imbestigasyon, duwa ka beses nagbisita si VP Sara sa Camp Bagong Diwa.
Una, ginsiling nga gintuyo niya bisitahon si Madriaga apang namalibad ini magpakita kay Sara.
Ginkumpirma man sang NBI nga may nabaton sila nga impormasyon tuhoy sa tuyo nga pagkastigo kay Madriaga sa presohan.
Bukas naman ang Bombo Radyo para sa pahayag sang kampo ni VP Sara Duterte.
