Ginpasiguro sang Iloilo City Government nga secured na ang PWD (persons with disabilities) IDs sang mga beneficiaries sang syudad.
Ini kasunod sang paglinapta sang mga peke nga PWD-ID sa Iloilo City.
Sa interview sang Bombo Radyo kay Ms. Joy Fantilaga, spokesperson ni Iloilo City Mayor Jerry Treñas, iya ginpahayag nga 2023 sang nagpaguwa sang Executive Order (EO) No. 157 ang alkalde kon sa diin, may tinutuyo nga matumod ang lehitimo nga ID paagi sa security label nga nakabutang.
Suno kay Fantilaga, yara na sa 841 ang na-recover sang city government nga mga peke nga IDs, samtang yara naman sa 15,000 ka mga indibidwal sa syudad ang may lehitimop nga PWD IDs.
Ginklaro man sang natungdan nga indi pagbatunon sang syudad kon wala sang security label ang ID magluwas sa mga PWD ID sang mga indibidwal nga naghalin sa probinsya sang Iloilo.
Nagpasalig man ini nga padayon nga ginabantayan sang syudad ang mga nagapameke sang ID kon sa diin, gilayon nga gina-confiscate agud nga indi na magamit kag maglapta pa.
Nahibaluan nga sang damlag lang, nagpaguwa ang Restaurant Owners of the Philippines sang pahayag nga nagatumod sa lapnagon nga pagpameke sang pila ka mga indibidwal sang PWD IDs nga nagatuga sang disbentaha sa mga restaurant sa pungsod.
Nagasaad man sa statement nga kalabanan sa mga PWD ang wala nakahibalo nga ang 20% discount sa restaurant ang gina-cover sang mga tag-iya sang restaurant kag indi ang gobyerno.
Gintumod man sang organisasyon nga bangud sa pagpameke sang IDs, apektado man ang mga empleyado, presyo kag kalidad sang pagkaon sang restaurant.
